Беларусам пачалі адмаўляць у выдачы пашпарта старога ўзору. Даведаліся, у чым рэч і ці можна яго атрымаць

30 лiстапада 2022 у 1669811640
«Зеркало»

Яшчэ на мінулым тыдні, з 24 лістапада, у тэлеграм-канале «Собирай рюкзак», які расказвае пра падарожжы, пачала з'яўляцца інфармацыя пра абмежаванні на атрыманне пашпарта старога ўзору ў розных гарадах Беларусі. Пра праблемы з выдачай пашпарта беларусы таксама пісалі ў сацыяльных сетках і паведамлялі ў рэдакцыю «Люстэрка».

Тэлеграм-канал «Собирай рюкзак» паведамляе, што практычна ўсюды (акрамя Мінска і абласных гарадоў) людзям, якія звярнуліся па замену пашпарта, адмаўляюць у яго тэрміновым вырабе за 7 дзён. У некаторых выпадках ёсць і поўныя адмовы ў прыёме заявы на замену пашпарта і атрымання яго ў выглядзе старога ўзору нават у стандартны тэрмін. Замест гэтага грамадзянам прапануюць дакументы новага ўзору - ID-карту і біяметрычны пашпарт. З такім беларусы ўжо сутыкаюцца.

- У Брэсцкім АГіМ праблема з тэрміновай выдачай пашпартоў, - паведаміў нам чытач. - Як нам расказваў старшыня таварыстваў уласнікаў, у іх няма бланкаў.

Пры гэтым запіс на выдачу пашпартоў старога ўзору застаецца, але зробяць яго мінімум праз месяц. А можа, і пазней: калі ва ўстанове з'явяцца бланкі, чытач не ведае.

- Цяпер звычайныя пашпарты за 32 рублі нельга заказваць - «бланкі скончыліся», - піша ў Facebook беларуска Мая. - Толькі біяметрычныя. З айдзі-картай абавязкова. Каштуе 48 рублёў айдзі, 64 пашпарт і па 64 за тое і за другое за паскарэнне працэсу. 240 рублёў за ўсё.

З такой самай сітуацыяй сутыкнуўся жыхар Віцебскай вобласці Андрэй: паводле словаў мужчыны, старыя папяровыя пашпарты «больш не выдаюць, нібыта да распараджэння».

Што кажуць чыноўнікі?

Нашая чытачка патэлефанавала ў аддзел грамадзянства і міграцыі Гродна з пытаннем, ці сапраўды там перасталі выдаваць папяровыя пашпарты старога ўзору. Пашпартыстка ведамства ўдакладніла, што ўсё не зусім так.

- Пашпарт старога ўзору ў нас вырабляецца, але толькі цягам месяца, тэрміновай працэдуры для яго ў нас няма, - патлумачыла яна. - Калі вам патрэбны тэрмінова дакумент, вы можаце падавацца на біяметрычны пашпарт і ID-карту. Але вы яшчэ можаце падаць дакументы на пашпарт старога ўзору, проста яго будуць рабіць месяц.

Тое самае нам адказалі ў АГіМ Віцебска, куды нашая журналістка звярнулася як звычайная грамадзянка.

- Чаму не выдаюць пашпарты старога ўзору? Выдаюць. Проста пакуль гэта прыпынена з тэхнічных прычынз. Дзесьці месяцы паўтара-два давядзецца пачакаць, - расказала пашпартыстка. - Хочаце - атрымлівайце пашпарт старога ўзору, хочаце - новага. Калі важна старога ўзору - можаце і цяпер дакументы падаць, нічога страшнага, проста будзеце чакаць. Хочаце новы - прыходзьце да нас, калі ласка.