З 9 лістапада 2023 года ва Украіне пачынаецца фестываль дакументальнага кіно «1084. На мяжы», на якім цягам трох месяцаў у пяці гарадах пройдуць афлайн паказы беларускіх дакументальных стужак, а таксама іншыя культурныя мерапрыемствы. Пра гэта арганізатары форума паведамілі на сваім афіцыйным сайце.
«1084. На мяжы» — ужо другі фестываль ва Украіне, ініцыяваны беларускім асветніцка-сацыяльным грамадскім аб’яднаннем «Звяно». 1084 кіламетры — працягласць агульнай мяжы суверэнных Беларусі і Украіны.
Сёлета фестываль пройдзе ў пяці гарадах Украіны: Адэсе (з 9 па 11 лістапада), Луцку (з 18 па 20 лістапада), Бучы (18, 25−26 лістапада), Тэрнопалі (у снежні) і Кіеве (у студзені 2024 года).
У праграме фестывалю прадстаўленыя стужкі такіх незалежных беларускіх кінематаграфістаў, як Андрэй Куціла («Вадохрышча»), Вольга Прусак («Новае неба над новай краінай: прагулкі з Пушкіным»), Ганна Бадзяка і Аляксандр Міхалковіч («Motherland/Радзіма»), Аляксей Палуян («Кураж»), а таксама польскага рэжысёра Анджэя Фідыка («Беларускі вальс»).
Акрамя таго, у межах фестывалю 11 лістапада ў Адэсе адбудзецца канцэрт украінскага гурта «Колір», які стварыў некалькі песняў па творах Рыгора Барадуліна і зняволенага журналіста Андрэя Аляксандрава), а таксама падтрымаўшых беларускіх палітвязняў. А з 18 па 25 лістапада ў Луцку распачнецца выстава антываенных плакатаў беларускага мастака і дызайнера Уладзіміра Цэслера. Частка прац пад назвай Hitlerkaputin прысвечана беларускай рэчаіснасці і тэме поўнамаштабнага ўварвання Расіі ва Украіну.
Уваход на ўсе мерапрыемствы па free donation — сабраныя сродкі будут пералічаны на закуп расходных матэрыялаў для VAC-тэрапіі ран ва ўкраінскіх ваенных і грамадзянскіх шпіталях.