Лідара расійскага гурта ДДТ Юрыя Шаўчука правераць у РФ па крымінальным артыкуле пра публічныя заклікі да «экстрэмісцкай» дзейнасці. Падставай для разбіральніцтва стала прамова музыкі падчас ягонага канцэрту ў Дубаі, піша тэлеграм-канал Mash.
Мяркуючы з апублікаваных відэазапісаў з канцэрта Шаўчука ў Дубаі, у перапынку паміж песнямі ён падзяліўся з гледачамі сваімі думкамі наконт будучыні Расіі.
— Ёсць дзве канцэпцыі гістарычныя. Першая — гэта тое, што спачатку ўсё было добра, а потым усё добрае заканчваецца поўнай х*рней. А другая канцэпцыя — што ўся гэтая лажа заканчваецца нейкай там рэвалюцыяй, чымсьці добрым. Я прытрымліваюся другога пункту гледжання, — сказаў Шаўчук.
Праўладныя «грамадскія дзеячы» напісалі з гэтай нагоды скаргі ў расійскія Генпракуратуру і Мінюст з патрабаваннем праверыць выказванні музыкі.
Нагадаем, пасля пачатку поўнамаштабнай вайны РФ супраць Украіны Юрый Шаўчук асудзіў расійскую агрэсію. За «дыскрэдытацыю Узброеных сіл РФ» і крытыку расійскіх уладаў раней яго аштрафавалі на 50 тысяч расійскіх рублёў (1785 беларускіх рублёў). Праз гэтую пазіцыю канцэрты музыкі на радзіме пачалі адмяняць, таму ДДТ выступае за мяжой.