Лукашэнка зноў успомніў пра беларусаў, якія з'ехалі, і, здаецца, зноў не зразумеў маштабу праблемы: «Просяцца назад»

Аляксандр Лукашэнка заявіў, што некаторыя беларусы, што з’ехалі за мяжу, просяць магчымасці вярнуцца дадому, паведамляе яго прэс-служба. Ён успомніў пра спецкамісію і, здаецца, зноў не зразумеў маштабу праблемы.

«Як сёння збеглыя. З’ехалі за мяжу. Пасудамыйкамі ім прапанавалі працаваць — дактарам, настаўнікам. — А мы не хочам пасудамыйкамі. — Ну, тады ідзіце на вуліцу. Просяцца назад», — сказаў Лукашэнка, размаўляючы з работнікамі Мінскага метрапалітэна на адкрыцці новых станцый, нагадаўшы пра страйк машыністаў мінскага метро ў 90-х.

Паводле Лукашэнкі, менавіта таму была створаная камісія пад кіраўніцтвам генпракурора для разгляду зваротаў грамадзян, што знаходзяцца за мяжой.

«Ідзіце, тлумачце. Калі не падрывалі, не падпальвалі метро, барані Бог, прыязджайце, працуйце. Але калі здзейснілі правапарушэнне ці закон парушылі — адказвайце. Вось дакладна так было з машыністамі», — правёў аналогіі ён.

Нагадаем, што спецкамісія пры Генпракуратуры падоўжыла сваю працу на 2024-ы год. Колькі заяваў беларусаў паступіла ў яе сёлета, не паведамляецца, але за ўвесь 2023-ы — каля 150. Колькі з іх ухвалілі — невядома.

Паводле звестак Белстата на 1 студзеня 2024 года, насельніцтва Беларусі склала 9 155 978 чалавек. Гэта на 44 639 менш, чым за год да таго. Фактычна знік цэлы райцэнтр — прыкладна такі, як Ваўкавыск ці Слонім. З 2019 года колькасць беларусаў зменшылася на 257 468 чалавек. Гэта як Пінск, Жлобін і Слуцк разам узятыя.

Пры гэтым афіцыйная статыстыка не ўлічвае беларусаў, якія з’ехалі за апошнія некалькі гадоў. У Дэпартаменце грамадзянства і міграцыі МУС паведамлялі, што ў 2021−2022 гадах з’ехала больш за 200 тысяч чалавек. Раней намеснік міністра ўнутраных справаў Мікалай Карпянкоў ацэньваў эміграцыю ў 350 тысяч чалавек. Старшы даследчык Цэнтра новых ідэй Генадзь Коршунаў называў адток людзей з 2020 года ў «500−600 тысяч чалавек».

З улікам тых, хто з’ехаў, хутчэй за ўсё, у Беларусі можа жыць менш за 9 млн чалавек — такія разлікі прыводзілі эксперты BEROC.