«Гэты хлопец зрабіў усё, што абяцаў». Лукашэнка расказаў, чаму прыняў рашэнне памілаваць Пратасевіча

Аляксандр Лукашэнка, адказваючы на пытанні журналістаў падчас рабочай паездкі ў Мінскую вобласць, расказаў, чаму прыняў рашэнне памілаваць Рамана Пратасевіча.

«Што да Рамана Пратасевіча, тут усім зразумела і вядома. Перад ім былі пастаўленыя ўмовы. Калі мы гэта робім, мы робім усё, што робім. Гэты хлопец зрабіў усё, што паабяцаў. Гэта не таму, каб захаваць сабе жыццё ці не трапіць у турму. Не. У чалавека была перакананасць: ён прызнаўся, што зрабіў няправільна. Мы праверылі: на фронце ён не быў, нікога не забіваў», — перадае словы Лукашэнкі яго прэс-служба.

Як паведамлялася, 3 траўня ў Мінскім абласным судзе абвясцілі прысуд па «справе NEXTA». Суд прызнаў фігурантаў вінаватымі па ўсіх артыкулах абвінавачання. Раману Пратасевічу прызначылі 8 гадоў калоніі ўзмоцненага рэжыму, Сцяпану Пуцілу — 20 гадоў, Яну Рудзіку — 19 гадоў.

Раман Пратасевіч прысутнічаў на абвяшчэнні прысуду — ён прыехаў у суд адразу з торбай, бо абвінавачанне прасіла ўзяць яго пад варту адразу пасля вынясення вердыкту. Аднак суд пакінуў ранейшую меру стрымання да ўступлення прысуду ў сілу — хатні арышт.

18 траўня стала вядома, што прысуд у дачыненні да фігурантаў «справы NEXTA» набыў законную моц, бо не быў абскарджаны і апратэставаны. А ў канцы траўня Лукашэнка памілаваў Пратасевіча.