Як стала вядома «Люстэрку», у аўторак, 18 ліпеня, супрацоўнікам літоўскага офіса кампаніі Wargaming прыйшоў ліст ад кіраўніцтва. У ім адміністрацыя папярэдзіла, што Літва можа ануляваць від на жыхарства тым, хто служыў у беларускім войску па кантракце. У лісце ішла гаворка як мінімум пра двух супрацоўнікаў, якіх ужо пазбавілі ВНЖ.
— У лісце гаворыцца, што Літва анулюе віды на жыхарства, якія атрымалі беларусы, што раней служылі па кантракце ва Узброеных сілах РБ. Гаворка пра прапаршчыкаў і афіцэраў. Прычым анулююць без усялякага папярэджання — проста ставяць перад фактам, — расказала «Люстэрку» крыніца, знаёмая з сітуацыяй. Гэтую інфармацыю нам пацвердзіў і дзейны супрацоўнік кампаніі.
Нам не ўдалося аператыўна атрымаць каментар ад Wargaming што да сітуацыі з ануляванымі ВНЖ. Як толькі (і калі) мы яго атрымаем, то адразу апублікуем.
Як правіла, высокакваліфікаваныя спецыялісты, якія атрымліваюць больш за 1,5 сярэдняга заробку ў Літве (у першым квартале 2023 года сярэдні заробак склаў 1192 еўра на рукі. — Заўв. рэд.), могуць прэтэндаваць на Blue card. Гэта спецыяльны від на жыхарства ў ЕС тэрмінам на тры гады. Рашэнне пра яго выдачу краіна ЕС прымае самастойна. Быў у двух супрацоўнікаў Wargaming Blue card ці «звычайны» ВНЖ, невядома.
У Wargaming у Літве працуе 986 чалавек. Чысты прыбытак літоўскай кампаніі па выніках 2022 года склаў больш за 2,2 мільёна еўра, яна ўваходзіць у тройку найбуйнейшых падаткаплатнікаў Літвы ў сферы IT.
Што кажуць у Дэпартаменце міграцыі
Па каментар «Люстэрка» звярнулася ў Дэпартамент па міграцыі пры МУС Літвы. Там адзначылі, што не каментуюць персанальных кейсаў па ануляванні ВНЖ і не маюць інфармацыі пра колькасць супрацоўнікаў кампаніі, якіх пазбавілі гэтага дакумента. Але дадалі, што, як правіла, такія рашэнні міграцыйныя службы прымаюць грунтуючыся на рэкамендацыях Дэпартамента дзяржбяспекі.
Мы звярнуліся і ў Дэпартамент дзяржбяспекі Літвы, пацікавіліся, чаму былых вайскоўцаў-кантрактнікаў, якія працуюць у Wargaming, пазбавілі ВНЖ.
— Дэпартамент дзяржаўнай бяспекі ацэньвае пагрозу дзяржаўнай бяспецы з боку замежнікаў у кожным канкрэтным выпадку з улікам канкрэтных абставінаў, — гаворыцца ў адказе прэс-службы. — Ацэнка пагрозы, якая ідзе ад асобы, можа быць змененая пасля высвятленні новых абставінаў у дачыненні да асобы, а таксама змены геапалітычнай сітуацыі. Прававыя акты не акрэсліваюць паняцця пагрозы бяспецы дзяржавы або вычарпальнага пераліку пагрозаў бяспецы дзяржавы — ацэнка ажыццяўляецца з улікам канкрэтных абставінаў, судовай практыкі і да т. п. Звяртаем вашую ўвагу, што суды неаднаразова адзначалі, што права прыязджаць у Літоўскую Рэспубліку і жыць тут не з’яўляецца натуральным, яно не даецца аўтаматычна грамадзянам трэціх краін і набываецца толькі ў тым выпадку, калі гэтыя асобы адпавядаюць патрабаванням закона «Пра прававое становішча замежных асобаў». Канчатковыя рашэнні пра ануляванне віду на жыхарства ў Літве прымае Дэпартамент міграцыі, ацэньваючы ўсе адпаведныя абставіны ў кожным канкрэтным выпадку, уключаючы ацэнку Дэпартамента дзяржбяспекі.
Нагадаем, не так даўно ў Дэпартаменце міграцыі Літвы паведамілі, колькі беларусаў з пачатку года атрымалі адмову ў выдачы ВНЖ краіны. На канец траўня іх было 309 — нашмат больш, чым за ўвесь 2022 год. Ім адмовілі з прычыны пагрозы бяспецы — напрыклад, людзі маглі адзначыць у анкеце, што падтрымліваюць Расію ў вайне.
Чытайце таксама
