Беларускія памежнікі паведамілі, што знойдзеныя два загінулыя мігранты на мяжы з Латвіяй. Дзяржпагранкамітэт сцвярджае, што ў абодвух выпадках замежнікі ўжо былі на тэрыторыі суседняй краіны, але латвійскія памежнікі перамясцілі іх назад у Беларусь.
Першы труп знайшлі ў ноч на 10 студзеня. Паводле паведамлення ДПК, побач з ім былі яшчэ некалькі мігрантаў, якія расказалі беларускім сілавікам (і ў пацверджанне паказалі відэа), што іх таварыш быў у крытычным стане ўжо ў Латвіі і не мог сам перасоўвацца, але латвійскія памежнікі прывезлі іх назад на мяжу, праігнараваўшы просьбы аказаць мужчыну дапамогу.
«Нягледзячы на тое, што мужчына фактычна быў пры смерці і меў патрэбу ў тэрміновай шпіталізацыі, латвійскія вайскоўцы выкінулі групу на мяжы і пад пагрозай зброі прымусілі прайсці праз загароду», — сцвярджае беларускі Дзяржпамежкамітэт.
Потым мігранты спрабавалі цягнуць мужчыну, але яму было ўсё горш, а на момант прыбыцця беларускіх памежнікаў і медыкаў ён быў ужо мёртвы, кажуць у ведамстве.
Другога загінулага беларускія памежнікі знайшлі амаль на лініі мяжы, за некалькі метраў ад латвійскай загароды.
«Зыходзячы з характару слядоў, пакінутых на месцы здарэння, труп, хутчэй за ўсё, быў перамешчаны з сумежнай тэрыторыі праз загароду. Акрамя таго, у памежным плоце была дэмантаваная драцяная секцыя, якая магла выкарыстоўвацца для перамяшчэння цела ўцекача», — гаворыцца ў заяве ДПК.
У абодвух выпадках на месцах працавалі следча-аператыўныя групы, вядуцца праверкі.