Адразу некалькі беларускіх камерцыйных банкаў за апошні час змянілі ўмовы міжнародных пераводаў для фізічных асоб. Некаторыя фактычна ўвялі забаронныя камісіі. Office Life паспрабаваў разабрацца, у чым рэч.
Якія банкі і што змянілі
РРБ-Банк абвясціў, што з 24 да 30 лістапада не ажыццяўляе міжнародных пераводаў фізічных асоб у далярах. А з 1 снежня банк забараняе міжнародныя пераводы фізічных асоб у далярах на суму, меншую чым 20 000 даляраў.
Парытэтбанк з 24 лістапада прыпыніў адпраўку міжнародных грашовых пераводаў SWIFT у еўра для фізічных асоб. Атрымліваць плацяжы SWIFT у еўра і іншых валютах, а таксама адпраўляць міжнародныя плацяжы ў валютах, акрамя еўра і даляраў, можна як і раней.
Раней Прыёрбанк з 18 лістапада увёў новыя ўмовы для міжнародных пераводаў: толькі з адкрыццём рахунку; толькі ў валюце, адрознай ад даляра і (або) еўра; толькі без продажу даляраў і/або еўра; мінімальная сума — 10 000 даляраў у эквіваленце.
Акрамя таго, плата за аперацыю спісваецца з рахунку кліента і не ўключае выдаткаў, звязаных з выплатай камісій банкам-карэспандэнтам (банкам-атрымальнікам), якія ўзнікаюць пры дадатковых запытах, расследаваннях, вяртанні пераводаў.
У банка засталася опцыя пераводу грошай за мяжу з карты на карту, але з канвертаваннем у беларускія рублі (камісія 1,2% + 1,9 рубля) і лімітам 900 рублёў на адну аперацыю і 4500 рублёў у месяц.
У Тэхнабанку з 15 лістапада міжнародныя банкаўскія пераводы ў далярах з прызначэннем, звязаным з аплатай набыцця аўтатранспартных сродкаў і іншых спадарожных гэтаму паслуг (перавозка, дастаўка аўтатранспартных сродкаў і да т.п.), ажыццяўляюцца толькі на суму ад 10 000 даляраў.
Што кажуць у банках
Тэхнабанк адмовіўся каментаваць рашэнне па міжнародных пераводах у валюце для фізічных асоб. У РРБ-Банк Office Life адправіў пісьмовы запыт і чакае адказу.
Прыёрбанк таксама адмовіўся ад афіцыйных каментароў. А ў чаце на сайце банка Office Life сказалі, што не ведаюць, ці з’явіцца калі-небудзь зноў опцыя SWIFT-пераводаў для невялікіх сумаў.
У Парытэтбанку паведамілі, што пераналаджваюць лінейку прадуктаў, у тым ліку і пераводы SWIFT у еўра і далярах. Пры гэтым і цяпер у кліентаў банка застаецца магчымасць пераводзіць за мяжу грошы ў далярах і еўра праз іншыя інструменты, напрыклад p2p-пераводы.
Наколькі вядома Office Life, рашэнні банкаў не звязаныя з нейкімі новымі патрабаваннямі з боку рэгулятара і прымаліся імі самастойна.
З чым могуць быць звязаныя змены
Крыніцы Office Life у банкаўскіх колах згаджаюцца, што прычыны таго, што адбываецца з міжнароднымі пераводамі, варта шукаць на баку банкаў-карэспандэнтаў беларускіх фінустановаў за мяжой.
У лістападзе некаторыя беларускія банкі вычарпалі ліміты на SWIFT-пераводы, устаноўленыя замежнымі банкамі-партнёрамі. А абмежаванні для фізічных асоб уводзяцца, каб адсекчы частку пераводаў і даць магчымасць свабодна пераводзіць грошы юрыдычным асобам.
Паводле іншай версіі, замежныя партнёры беларускіх банкаў паднялі тарыфы на абслугоўванне SWIFT-пераводаў, што робіць іх нявыгаднымі для беларускага боку.
Таксама крыніцы на рынку звяртаюць увагу, што ў банкаўскай супольнасці асцерагаюцца магчымага ўвядзення новых абмежаванняў на SWIFT-пераводы ў будучыні. Той факт, што ўмовы па іх змяніў у тым ліку і Прыёрбанк, праз карэспандэнцкі рахунак якога працуюць многія беларускія банкі, можа быць кепскім сігналам для рынку.