Аляксандр Лукашэнка ў інтэрв'ю расійскай прапагандыстцы Вользе Скабеевай прызнаў, што не зможа самастойна выкарыстоўваць тактычную ядзерную зброю, якую Расія плануе размясціць у Беларусі. Гэтае пытанне яму трэба будзе папярэдне ўзгадніць з прэзідэнтам РФ Уладзімірам Пуціным.
Прапагандыстка пацікавілася, хто ўсё ж будзе распараджацца тактычнай ядзернай зброяй, якую Расія перадасць Беларусі.
— Якая ўсё ж дамоўленасць? Калі агрэсія, трэба будзе ўсё ж стэлефанавацца з Пуціным? — спытала Скабеева.
— Вось часта чую: «А, вось гэтую расійскую зброю без Расіі ён не выкарыстае». Слухайце, калі пачнецца вайна, я што, буду глядзець вакол?! Ды не. Зняў трубку — дзе б ён (Уладзімір Пуцін. — Заўв. рэд.) ні быў, ён патэлефанаваў — я зняў трубку, у любы момант. Нават вось цяпер. Таму ну ў чым праблема ўзгаднення нейкага там удару? Гэта не пытанне! Тут спрачацца нават няма пра што. Тут мы ўжо дамовіліся. Хай ворагі, Воля, трымцяць, — заявіў Лукашэнка.
У гутарцы са Скабеевай ён таксама расказаў, што тактычная ядзерная зброя, якая размяшчаецца РФ у Беларусі, утрая больш магутная, чым выкарыстаныя ЗША бомбы ў Хірасіме і Нагасакі. Захоўвацца яна будзе на некалькіх пляцоўках.
— У нас ракеты і бомбы. Мы атрымалі ад Расіі. Бомба ў тры разы больш магутная, чым у Хірасіме і Нагасакі. Там больш за 80 тысяч імгненна загінула, 250 ад аднаго ўдару. А гэта адна бомба ў тры разы больш магутная. Гэта, ну я не ведаю, пад мільён чалавек загіне адразу. Не дай бог выкарыстоўваць гэтую зброю, — заявіў ён.
Нагадаем, 25 чэрвеня міністры абароны Беларусі і Расіі падпісалі дакументы, якія вызначаюць парадак трымання расійскай нестратэгічнай ядзернай зброі ў спецыяльным сховішчы на тэрыторыі Беларусі. Кіраўнік расійскага ваеннага ведамства Сяргей Шайгу тады ўдакладніў, што Расія, размяшчаючы нестратэгічную ядзерную зброю на тэрыторыі Беларусі, не перадае яе рэспубліцы, кантроль над ёю і рашэнне пра выкарыстанне застаецца за Масквой.
Аляксандр Лукашэнка раней заяўляў, што калі Расія размесціць сваю тактычную ядзерную зброю ў нашай краіне, то кіраваць ёю будзе Беларусь.
«Усё будзе па законе і па правілах. Бескантрольнай зброі ў Беларусі няма і быць не можа. Таму кіраваць усім тым, што ёсць у Беларусі, будзем мы тут», — сказаў Лукашэнка ў сваім пасланні беларускаму народу 31 сакавіка.
Зрэшты, гэтую ягоную заяву хутка абверглі ў Крамлі.
Чытайце таксама
