Падатковая Вілейскага раёна зацікавілася мясцовым жыхаром, які купіў Mercedes-Benz, камп’ютарную тэхніку і будаваў дом. Расказваем, чаму ўзніклі пытанні і чым усё скончылася.
Інспекцыя МПЗ па Вілейскім раёне зладзіла праверку індывідуальнага прадпрымальніка, які займаецца сезоннымі працамі па добраўпарадкаванні магіл. Падаткавікоў збянтэжыла, што мужчына адзначае нязначныя сумы даходаў ад гэтай працы, а іншай у яго няма. Пры гэтым ён пабудаваў жылы дом, купіў аўтамабіль Mercedes-Benz, камп’ютарную тэхніку, а таксама 90 000 даляраў.
«Па выніках гэтай праверкі грамадзянінам не пацверджаныя крыніцы даходаў, у сувязі з чым з сумы перавышэння выдаткаў над даходамі ў памеры 337,5 тыс. рублёў яму давялося выплаціць 87,7 тыс. рублёў падаходнага падатку», — удакладняюць у інспекцыі МПЗ па Вілейскім раёне.
Падаткавікі таксама ўдакладняюць, што ўвесь час супастаўляюць выдаткі і даходы насельніцтва. Пад асаблівым кантролем тыя, хто не атрымлівае даходаў з афіцыйных крыніц (або нязначныя даходы), але пры гэтым купляе дарагую нерухомую маёмасць, транспартныя сродкі, а таксама мае іншыя буйныя выдаткі. То-бок жыве «не па сродках», дадаюць падаткавікі.
«Пры выяўленні фізічных асобаў, выдаткі якіх перавышаюць атрыманыя імі даходы, такім асобам з устаноўленай сумы перавышэння вылічваецца і выстаўляецца да выплаты падаходны падатак з фізічных асобаў па стаўцы 26%», — удакладняюць у інспекцыі МПЗ па Вілейскім раёне.
Калі ў падатковай узніклі пытанні па вашых даходах і выдатках, то просім расказаць вашую гісторыю. Для гэтага напішыце нам на пошту [email protected] ці ў тэлеграм.
