У Беларусі з’явілася новая латарэя «То!Лото мульти». Гэта вынікае з апублікаванай пастановы Кіраўніцтва справамі Лукашэнкі на Нацыянальным прававым інтэрнэт-партале. Нагадаем, латарэйны бізнес у Беларусі манапалізаваны дзяржавай, то-бок заснавальнікамі латарэй выступаюць толькі дзяржструктуры. Гэта Мінспорту, Мінпрацы, Кіраўніцтва справамі Лукашэнкі, МНС, а таксама гарадскія або абласныя выканкамы.
Заснавальнікі латарэй працуюць праз двух арганізатараў. Гэта «Беларускія латарэі» і «Нацыянальныя спартыўныя латарэі». Першай з іх належыць не менш за 22 латарэі, другой — не менш за дзевяць (паводле звестак на лістапад 2022 года). Прычым цягам многіх гадоў, калі меркаваць з архіва Мінфіна, іх колькасць змянялася нязначна — адны закрываліся, а на іх месца прыходзілі іншыя.
Пры гэтым заснавальнік кампаніі «Нацыянальныя спартыўныя латарэі» — Мінспорту і турызму. А вось «Беларускія латарэі» — найбуйнейшая арганізацыя ў гэтай галіне — першапачаткова была заснаваная Камітэтам па каштоўных паперах пры Саўміне (пазней быў перайменаваны ў дэпартамент). У 2006 годзе спецыяльным указам Аляксандра Лукашэнкі арганізацыя перайшла пад крыло яго Кіраўніцтва справамі. Зрабілі гэта для «стварэння дадатковай крыніцы фінансавання для развіцця турыстычнай інфраструктуры дзяржаўных прыродаахоўных установаў, падпарадкаваных Кіраўніцтву справамі прэзідэнта».
Колькі зарабляюць на латарэях і як менавіта выдаткоўваюць гэтыя грошы, дзяржструктуры публічнай справаздачы не даюць.
Часцей за ўсё выйгрышны фонд не перавышае 50% ад сродкаў, здабытых ад продажу білетаў накладу латарэі. То-бок на выйгрышы ідзе да паловы заробленай ад продажу сумы. Але бываюць выключэнні, напрыклад, у электронных латарэях ён можа дасягаць 95%.
Чытайце таксама
