У чацвер, 1 жніўня, праходзіць абмен зняволенымі паміж Расіяй і Захадам з ЗША. Паводле інфармацыі СМІ, у ім удзельнічае 24 чалавекі, у тым ліку памілаваны ў Беларусі немец Рыка Крыгер. Навіну пра абмен пракаментаваў Офіс Святланы Ціханоўскай.
— Мы не ўдзельнічалі ў гэтых перамовах і маем абмежаваную інфармацыю. На жаль, у нас няма сведчанняў, што гэты абмен можа ці мог бы прывесці да вызвалення беларускіх палітвязняў. Відавочна, што гэта былі перамовы з Масквой, і Мiнск у іх не ўдзельнічаў, — заявіла прэс-служба.
Прадстаўнікі Офіса прывіталі факт вызвалення палітвязняў з расійскіх турмаў. І адзначылі, што ён можа быць важным для беларусаў.
— Сам факт такога абмену вязнямі, калі скончыцца паспяхова, можа быць важным прэцэдэнтам, які дапаможа і ў вызваленні беларусаў, — лічаць у Офісе. — Натуральна, абмен дзеля вызвалення падразумявае, што ёсць на каго ці што абменьваць. І гэта адрознівае беларускую сітуацыю ад расійскай.
У прэс-службе падкрэслілі, што дэмсілы карыстаюцца кожнай магчымасцю, каб вызваліць палітвязняў.
— Мы ставім гэтае пытанне рэгулярна перад заходнімі партнёрамі. У нас адбываюцца кансультацыі ў самых розных фарматах, натуральна, непублічна. І мы ведаем, што робяцца самыя розныя намаганні па вызваленні беларусаў. На жаль, праблема не з боку заходніх партнёраў, а з боку рэжыму, які не зацікаўлены ў вызваленні людзей і адкрыта гэта дэманструе, — канстатавалі ў Офісе Святланы Ціханоўскай.
Што адбываецца?
Як паведамляе турэцкі тэлеканал NTV, абмен зняволенымі паміж Расіяй і Захадам праходзіць у аэрапорце Анкары. Там прызямліўся самалёт Ту-204 лётнага атрада «Расія». Турэцкае агенцтва IHA сцвярджае, што працэс курыруе ўпраўленне разведкі Турцыі.
Усяго ў абмене зняволенымі паміж Расіяй, ЗША, Германіяй і яшчэ трыма краінамі Захаду фігуруюць 24 чалавекі, паведамляе тэлекампанія CBS. Паводле звестак выдання, у Расіі вызваленыя трое зняволеных амерыканскіх грамадзян, уключаючы рэпарцёра Wall Street Journal Эвана Гершковіча, былога марскога пяхотніка Пола Уілана і журналістку «Радыё Свабода» Алсу Курмашову.
Чакаецца, што ў межах угоды не менш за 12 расійскіх палітвязняў адпусцяць у Германію. У Расію ж вернуцца восем грамадзян гэтай краіны, у тым ліку некалькіх падазраваных у сувязях з расійскай разведкай.
Сярод грамадзян РФ, якія, як чакаецца, будуць удзельнічаць у абмене, — Вадзім Красікаў, асуджаны на пажыццёвае зняволенне за забойства былога чачэнскага палявога камандзіра Зелімхана Хангашвілі. А таксама крытык Крамля і журналіст The Washington Post Уладзімір Кара-Мурза. Ён грамадзянін Вялікабрытаніі і Расіі і ўладальнік грын-карты, яго сям’я жыве ў ЗША.