У Мінску з 29 верасня канчаткова закрываюцца крамы польскага абутку Wojas, піша «Смартпрэс» са спасылкай на прадстаўнікоў рытэйлера.
«Заснавальнік — польскі бок прыняў рашэнне. 29 верасня — апошні працоўны дзень дзвюх крамаў: у ГЦ Expobel і ў GreenCity. У ГЦ „Замак“ крама ўжо закрытая», — паведамілі парталу ў кампаніі «Вояс Бел».
Там расказалі, што спрабавалі атрымаць квоты ад «Беллегпрама», але рэгулятар квоты летам не выдаў.
«Няма тавару, і няма магчымасці завезці тавар. Мы спрабавалі, і заснавальнікі спрабавалі. Але, на жаль, у сувязі з санкцыямі няма магчымасці працягваць працу», — растлумачылі прадстаўнікі рытэйлера.
Нераспрададзеныя да 29 верасня рэшткі абутку і галантарэі будуць вернутыя назад у Польшчу. Гэта стандартная працэдура ў канцы кожнага сезона.
У кампаніі таксама адзначылі, што аналагічная сітуацыя ва ўсіх прадаўцоў польскага абутку: «Ніхто не змог завезці тавар».
Нагадаем, навіна пра закрыццё крамаў польскага абутку Wojas упершыню з’явілася 26 траўня 2024 года — тады працаўнікі сеткі заявілі, што распрадаюць тавар і спыняюць працу.
Паведамлялася, што прычынай рашэння закрыцца сталі контрсанкцыі ўрада Беларусі, што пашырылі спіс тавараў, якія нельга ўвозіць з Польшчы, а таксама з Латвіі, Літвы, Польшчы, Чэхіі і Эстоніі і прадаваць у Беларусі.
Сярод іншага Мінск забараніў завозіць з гэтых пяці краін абутак — як гумовы, так і скураны.
Аднак ужо на наступны дзень, 27 траўня, рытэйлер абверг звесткі пра закрыццё крамаў.
Чытайце таксама
