Аляксандр Лукашэнка ў інтэрв'ю брытанскаму журналісту Стывену Розэнбергу заявіў, што сям’я палітычнай зняволенай Марыі Калеснікавай не цікавіцца яе лёсам і не хоча сустрэцца з ёй. Ён таксама дадаў, што гатовы разгледзець магчымасць памілавання Марыі, калі будзе такая просьба. Сястра Калеснікавай Таццяна Хоміч расказала «Люстэрку», як сям’я палітзняволенай адрэагавала на словы Лукашэнкі і што думае наконт прапановы памілавання.
— Я вельмі расхвалявалася, слухаючы тое, што Аляксандр Лукашэнка казаў учора журналісту Бі-бі-сі пра Машу. Скажу шчыра, я хвалююся дагэтуль, — кажа Таццяна. — Вельмі важна, што замежныя журналісты задаюць яму пытанні пра Марыю і іншых палітвязняў. Спадзяюся, што міжнародная агалоска дапаможа таму, каб наш голас быў пачуты. Я ўвесь час кажу пра тое, што Машу трэба ратаваць, як і многіх іншых людзей у беларускіх турмах, што маюць праблемы са здароўем. Учора ў мяне з’явілася невялікая надзея, што хутка, магчыма, будзе разгледжаная магчымасць вызвалення маёй сястры. Я лічу вельмі важным, што гэта абмяркоўваецца.
Таццяна абвяргае словы палітыка пра тое, што яе сям'і нецікава сустракацца з Марыяй.
— Лукашэнка сказаў, што нашай сям'і нецікавая сустрэча з Машай. Вядома, гэта не так. Можа, ён ведае нейкія падрабязнасці, якіх не ведаем мы, але з блізкіх і родных у Беларусі цяпер застаўся толькі наш тата. Мамы не стала пяць гадоў таму, а я пакуль не магу вярнуцца ў краіну. Вядома, мы з бацькам вельмі чакаем Машу на волі. І вельмі перажываем за яе, — тлумачыць суразмоўніца.
Яна дадае, што пасля таго, як з сястрой знікла сувязь, родныя некалькі разоў звярталіся з просьбамі пра спатканне і ў адміністрацыю калоніі, і ў вышэйшыя інстанцыі. Сваякі Калеснікавай таксама скіроўвалі запыты наконт яе стану здароўя, пыталі, чаму ад яе няма лістоў і званкоў.
— Летась наш бацька наведваў адміністрацыю калоніі, і там яму ў вельмі расплывістых фармулёўках паведамілі, што Маша не піша лісты і не тэлефануе, бо не хоча гэтага рабіць, а ад спатканняў з татам і адвакатамі адмаўляецца. У 2024-м начальнік калоніі наогул праігнараваў наш зварот, — кажа Таццяна. — У беларускіх турмах створаная такая сістэма, пры якой для таго, каб сваякі маглі атрымаць спатканне са зняволенымі, трэба, каб паміж імі была сувязь. Звычайна альбо ў лістах, альбо праз тэлефон зняволеныя паведамляюць родным, што хочуць і могуць убачыцца, і дамаўляюцца на пэўную дату. Але калі няма ніякай сувязі, то любая магчымасць спатканняў цалкам блакуецца. У нас з Машай не было наогул ніякай камунікацыі ўжо больш за 600 дзён.
Таццяна Хоміч адзначае, што пасля заявы Лукашэнкі ў інтэрв'ю Бі-бі-сі бацька Марыі плануе напісаць заяву на спатканне з ёй.
— Але трэба разумець, што за доўгі час ніводная нашая спроба сустрэцца не скончылася поспехам. Мы вельмі спадзяёмся, што цяпер сітуацыя зменіцца і тата атрымае дазвол на спатканне найбліжэйшым часам, — кажа яна.
Лукашэнка таксама згадаў магчымасць памілавання Марыі. Таццяна кажа, што гэта вельмі складанае пытанне. Паводле яе, рашэнне напісаць прашэнне на памілаванне будзе прымаць яе сястра.
— Ці хоча Маша пісаць прашэнне — пра гэта трэба пытаць у яе, я не ведаю адказу. Ва ўладаў, адміністрацыі калоніі, супрацоўнікаў пракуратуры ёсць магчымасць наўпрост спытаць Машу пра гэта. Мы гэтага зрабіць не можам, бо, паўтаруся, сувязі з маёй сястрой у нас няма ўжо больш за 600 дзён, — сказала на заканчэнне Таццяна Хоміч.
Чытайце таксама
