Следчы камітэт распачаў крымінальную справу ў дачыненні да прадстаўніка салігорскага футбольнага клуба «Шахцёр». Прычына — нібыта спроба паўплываць на вынік матча чэмпіянату Беларусі па футболе.
Факт «супрацьпраўнага ўплыву» на вынік матча выявіў ГУБАЗіК. Цяпер у дачыненні да прадстаўніка футбольнага клуба «Шахцёр» распачатая крымінальная справа па ч. 1 арт. 14, ч. 1 арт 253 КК (Замах на подкуп удзельнікаў спартовых спаборніцтваў). Максімальнае пакаранне па гэтым артыкуле — да 3 гадоў пазбаўлення волі. У цяперашні момант СК працягвае следчыя дзеянні.
Як паведаміў набліжаны да сілавікоў тэлеграм-канал, крымінальную справу таксама распачалі ў дачыненні да прадстаўніка футбольнага клуба «Белшына» за дамоўны матч у 30-м туры чэмпіянату Беларусі. Сцвярджаецца, што гэта можа стаць прычынай перагляду вынікаў чэмпіянату.
Раней выданне Tribuna. сom паведамляла, што 30 студзеня ў офісе футбольнага клуба «Шахцёр» у Салігорску праходзілі праверкі з удзелам узброеных сілавікоў.
Кантактныя тэлефоны клуба «Шахцёр», бухгалтэрыі і аддзела маркетынгу цяпер не адказваюць. Таксама мы не змаглі датэлефанавацца да прэс-сакратара ФК Віктара Валадзько.
Нагадаем, 22 студзеня ў Мінску затрымалі былога спартыўнага дырэктара салігорскага футбольнага клуба «Шахцёр» Уладзіміра Нідэргауса. Яго падазраюць у махлярстве. У той жа дзень імя Нідэргауса знікла з сайта каманды.
У мінулым сезоне салігорскі клуб стаў чэмпіёнам Беларусі.
