Дзеці з акупаваных тэрыторый Украіны прыязджалі ў Беларусь толькі са згоды іх бацькоў і законных прадстаўнікоў. У асноўным гэта дзеці-сіроты, бацькі якіх загінулі падчас баявых дзеянняў. Пра гэта заявіў амбасадар Беларусі ў Расіі Дзмітрый Крутой.
«З пачатку 2021 года і да цяперашняга часу на базе вядомага Нацыянальнага дзіцячага цэнтра „Зубраня“ і іншых аналагічных цэнтраў Беларусі прайшлі курс адпачынку і рэабілітацыі больш чым 3,5 тысячы дзяцей Данбаса. У асноўным гэта дзеці-сіроты, бацькі якіх загінулі падчас баявых дзеянняў, альбо выхадцы з няпоўных, малазабяспечаных сем’яў», — заявіў дыпламат.
Паводле Крутога, беларускі бок аказвае сістэмную дапамогу дзецям Данбаса.
«Насуперак нахабнай хлусні заходняй і ўкраінскай прапаганды, выезд дзяцей на аздараўленне ў Беларусь ажыццяўляўся толькі са згоды іх бацькоў і законных прадстаўнікоў», — заявіў Крутой.
Ён падзякаваў «за гэтую самаадданую працу» Дабрачыннаму фонду паралімпійскага чэмпіёна Аляксея Талая, Беларускаму саюзу моладзі, Беларускаму таварыству Чырвонага Крыжа, педагогам, медыцынскім работнікам і ўсім датычным.
Дэпартацыя ўкраінскіх дзяцей і ордар на арышт Лукашэнкі
Нагадаем, дзяцей з акупаваных тэрыторый Украіны прывозяць у Беларусь з 2016 года. Апошнім часам гэтым займаецца фонд паралімпійца і праўладнага актывіста Аляксея Талая з падтрымкай Беларускага Чырвонага Крыжа і іншых арганізацый.
ПАСЕ 27 красавіка гэтага года прыняла рэзалюцыю, у якой прызнала гвалтоўную дэпартацыю ўкраінскіх дзяцей у Расію генацыдам, а Аляксандра Лукашэнку і ўрад Беларусі — датычнымі да яго.
Еўрапарламент 13 верасня заклікаў МКС «разгледзець магчымасць выдачы міжнароднага ордара на арышт Лукашэнкі».
У МЗС Беларусі запэўніваюць, што часовыя прыезды дзяцей на аздараўленне ў Беларусь «адбываюцца з захаваннем адпаведных прававых працэдур, усе дзеці ўязджаюць і выязджаюць з Беларусі легальна ў суправаджэнні дарослых, маючы на руках усе неабходныя дакументы».
Раней Міжнародны крымінальны суд выдаў ордар на арышт прэзыдэнта Расіі Уладзіміра Пуціна і ўпаўнаважанай па правах дзіцяці ў гэтай краіне Марыі Львовай-Бяловай за незаконную дэпартацыю і перамяшчэнне ўкраінскіх дзяцей.