У следчым ізалятары Варшавы завяршылі праверку па факце гібелі беларуса Кірыла Кятуркі. Пра гэта гаворыцца ў адказе за подпісам прэс-сакратара дырэктара акруговай турэмнай службы ў Варшаве Барташа Мушыньскага, які атрымала выданне Hrodno.Life.
У лісце паведамляецца, што парушэнняў у дзеяннях супрацоўнікаў установы не выявілі.
«Рэанімацыйныя мерапрыемствы, праведзеныя супрацоўнікамі, а потым брыгадай хуткай дапамогі, выніку не далі. У адпаведнасці з дзейнымі правіламі, паліцыя і пракуратура правялі расследаванні. Мерапрыемствы, праведзеныя пенітэнцыярнай службай, не выявілі парушэнняў у выкананні службовых задач супрацоўнікамі, трэція асобы не спрыялі ўзнікненню інцыдэнту», — адказаў на запыт Hrodna.Life Барташ Мушыньскі.
Нагадаем, былога палітвязня з Беларусі Кірыла Кятурку знайшлі мёртвым 20 кастрычніка ў камеры следчага ізалятара ў Варшаве. Паводле папярэдняй версіі следства, ён учыніў суіцыд. Але знаёмыя маладога чалавека ўсумніліся ў гэтым.
На момант смерці Кірылу было 19 гадоў. У 2022 годзе ў Беларусі ён быў асуджаны за пратэсты 2020 года. Па хлопца прыйшлі, калі яму споўнілася 18 гадоў. Спачатку яго тры месяцы ўтрымлівалі ў гродзенскім СІЗА, а пасля асудзілі на два з паловай гады «хатняй хіміі». Амаль праз год Кірылу хацелі ўзмацніць рэжым і перавесці яго ў калонію, але ён паспеў пакінуць Беларусь.
Пасля ўцёкаў з Беларусі Кірыл жыў у Варшаве. У кастрычніку 2023 года ён знік і перастаў адказваць на паведамленні. Пазней стала вядома, што яго затрымалі.
Па факце смерці Кірыла Кятуркі распачалі крымінальную справу. Пра гэта газеце Wyborcza паведаміла прадстаўніца Варшаўскай акруговай пракуратуры Шымона Бана.