Беларус Дзмітрый Смактуновіч, праз якога 12 чэрвеня спыніўся рух у пункце пропуску «Брэст» на беларуска-польскай мяжы, вярнуўся на радзіму. Ніякіх прэтэнзій да яго «ўлады не маюць», паведамілі ў эфіры тлерадыёкампаніі «Брэст».
Дзмітрый — ураджэнец Бабруйска. За мяжу з’ехаў два гады таму. Працаваў таксістам. Праз ануляваны літоўскі ВНЖ яго дэпартавалі з Польшчы. Аднак ён не захацеў вяртацца на радзіму і амаль суткі прабыў на тэрыторыі паміж пунктамі пропуску «Тэрэспаль» і «Брэст». У выніку мужчына ўсё ж вырашыў пайсці ў Беларусь.
— Скончыўся літоўскі від на жыхарства два гады таму. Мяне Літва не апавясціла пра гэта. Я жыў там з сям’ёй. Ну і таму ламіўся назад (у Польшчу. — Заўв. рэд.). Сям’ю не хачу страчваць, — патлумачыў у эфіры ТРК «Брэст» прычыны сваіх паводзін Дзмітрый Смактуновіч, адзначыўшы, што прэтэнзій да беларускіх памежнікаў ён не мае: — Што паабяцалі, тое і зрабілі.
— А як паводзілі сябе польскія вартавыя межаў?
— Адзін спачатку груба сябе паводзіў, другі адэкватна. Ну, а трэція спрабавалі мяне выкінуць, але не атрымалася. Упяцярых не пацягнулі мяне, — сказаў Дзмітрый.
У сюжэце ТРК «Брэст» удакладнілі, што «ніякіх прэтэнзій да Дзмітрыя Смактуновіча ўлады Беларусі не маюць». Цяпер ён «будзе спрабаваць вырашаць пытанне пра ўз'яднанне з сям’ёй, якая засталася ў Польшчы».
Нагадаем, жонка Дзмітрыя расказвала, што прычынай дэпартацыі мужа стала ануляванне яго віду на жыхарства ў Літве, імаверна, праз тое, што мужчына раней працаваў дзяжурным у калоніі. Выданне MOST пісала, што прэтэнзіі да беларуса ва ўладаў Польшчы маглі ўзнікнуць праз тое, што ён перавозіў мігрантаў, якія нелегальна праніклі ў ЕС з беларускага боку. Жонка Дзмітрыя падкрэсліла, што гэтая судзімасць мужа была «цалкам пагашаная».
— Ён заплаціў штраф у поўным аб’ёме. У яго было ўмоўнае пакаранне, ён паўгода хадзіў адзначаўся два разы на тыдзень у паліцэйскі ўчастак. Дзіма актыўна дапамагаў следству, дапамог узяць вярхоўку, — кажа Наталля. — Тое, што гэта была нелегальная падпрацоўка, ён не ведаў. На той момант была сітуацыя вельмі складаная: мы пераехалі, у нас трое дзяцей, я медработніца і па спецыяльнасці адразу ўладкавацца не магу. А яго на працу ў Літву не выклікаюць і не выклікаюць. Тут прапанавалі падпрацоўку ў нейкім чаце, ён пагадзіўся. І на сваім асабістым аўтамабілі на беларускіх нумарах павёз гэтых мігрантаў. Ад’ехаў ад мяжы на кіламетраў пяць, і ў лесе яго злавілі. А Дзіма на той момант думаў, што проста трэба давезці людзей.
Чытайце таксама
