Польскі бок аднавіў прыём грузавых транспартных сродкаў, якія ідуць на выезд з Беларусі праз пункт пропуску «Казловічы». Пра гэта паведаміла прэс-служба Дзяржаўнага мытнага камітэта.
«Транспарт у кірунку Польшчы рухаецца, але пакуль нерытмічна», — паведамілі ва ўстанове.
Цяпер выезду з Беларусі праз пункт пропуску «Казловічы» чакае больш за 600 транспартных сродкаў.
Нагадаем, 10 ліпеня Дзяржаўны мытны камітэт Беларусі паведаміў, што Польшча не прымае грузавых транспартных сродкаў, якія ідуць з Беларусі праз пункт пропуску «Казловічы — Кукурыкі». У польскім Міністэрстве фінансаў, якому падпарадкоўваецца мытная служба гэтай краіны, «Люстэрку» пракаментавалі гэта так:
— Гэта няпраўда, што на памежным пераходзе «Кукурыкі — Казловічы» было спыненае афармленне тавараў, — расказала прэс-сакратарка Нацыянальнай падатковай адміністрацыі Міністэрства фінансаў Польшчы Юстына Пасячынская. — Нацыянальная падатковая адміністрацыя выконвае свае задачы ў адпаведнасці з дзейнымі нацыянальнымі правіламі. А таксама правіламі ЕС што да спынення абыходу санкцый. З 1 ліпеня ўступіў у сілу рэгламент Рады Еўрапейскага саюза, які пашырыў пералік тавараў, што падпадаюць пад санкцыі. Адпаведна, Нацыянальная падатковая адміністрацыя абавязаная выконваць гэтыя правілы. Праверкі праводзяцца на пастаяннай аснове.
У пачатку ліпеня Польшча 33 гадзіны блакавала чыгуначны рух на буйным мытным тэрмінале ў Малашэвічах на мяжы з Беларуссю: фармальна там праводзіліся «кантрольныя мерапрыемствы». Паводле неафіцыйнай інфармацыі, тым самым беларускім уладам далі «выразны сігнал» пра тое, што чыгуначны транзіт з Беларусі ў ЕЗ можа быць перакрыты.
Чытайце таксама
