Па ўсёй Беларусі выкладчыкаў выклікаюць у КДБ па справе інтэрнэт-праекта дапамогі настаўнікам «Адукаванка», які прызнаны «экстрэмісцкім фарміраваннем». Ёсць затрыманні, паведамляе праваабарончы цэнтр «Вясна».
У праваабаронцаў ёсць інфармацыя, што педагогі, якія ўдзельнічалі ў тэлеграм-чаце праекта «Адукаванка», зазнаюць пераслед па ўсёй краіне. Іх выклікаюць у КДБ, вядома таксама пра затрыманні.
У самім чаце абмяркоўваліся ўрокі, інавацыйныя тэхналогіі выкладання матэрыялаў і гэтак далей.
Нагадаем, напярэдадні стала вядома, што беларускі праект рэсурснай дапамогі настаўнікам «Адукаванка» прызналі"экстрэмісцкім фарміраваннем". Паводле звестак праваабаронцаў, рашэнне абвясціць гэтую ініцыятыву «экстрэмісцкай» КДБ прыняў 28 жніўня, ён жа растлумачыў, што гэта звязана з тым, што да праекта датычныя Кацярына Куксо і Алёна Мельчанка.
Раней прапагандысцкае выданне «СБ. Беларусь сегодня» публікавала матэрыял пра нібыта выкрыццё «падрыўной сеткі анлайн-навучання», дзе згадвалася Кацярына Куксо.
У гэтай жа газеце згадвалася і Алёна Мельчанка, якая была ў камандзе «Настаўнік для Беларусі». Яе старонка ў сацсетках нібыта не спадабалася «звычайным беларусам», якія ўважліва вывучалі каманду праекта.
«Адукаванка» — некамерцыйная грамадская ініцыятыва, асноўная мэта якой — стварэнне пляцоўкі, дзе будуць аб’яднаныя праблемы адукацыі, іх рашэнні і людзі, гатовыя над імі працаваць.