У Мінабароны Расіі пракаментавалі ўчорашні ракетны ўдар па Украіне, традыцыйна заявіўшы, што білі «высокадакладнай зброяй» і трапілі па ўсіх запланаваных цэлях. У Генштабе УСУ адзначаюць, што расійскія войскі спрабуюць наступаць на Бахмуцкім і палепшыць тактычнае становішча на Ліманскім і Купянскім напрамках. У Інстытуце па вывучэнні вайны кажуць, што, нягледзячы на абмежаванасць рэсурсаў, РФ найбліжэйшым часам працягне наносіць удары па крытычна важных аб’ектах ва Украіне, каб прымусіць украінскі народ пакутаваць.
Расказваем пра галоўнае са зводак штабоў і высноваў экспертаў на 310-ы дзень вайны ва Украіне.
Генштаб УСУ: пабілі пяць пунктаў кіравання расійскіх войскаў
За мінулыя суткі расійскія войскі нанеслі 85 ракетных і 35 авіяцыйных удараў, а таксама ажыццявілі 63 абстрэлы з рэактыўных сістэм залпавага агню, паведамляе Генштаб УСУ ў ранішняй зводцы.
— На Северскім і Слабажанскім напрамках расійскія войскі абстралялі з артылерыі раёны дзевяці населеных пунктаў і нанеслі авіяцыйны ўдар паблізу Вялікай Пісараўкі Сумскай вобласці; на Купянскім і Ліманскім напрамках агнявому ўздзеянню падвергліся раёны 17 населеных пунктаў; на Бахмуцкім напрамку расіяне абстралялі 20 населеных пунктаў; на Аўдзееўскім — сем; на Навапаўлаўскім напрамку з танкаў і ствольнай артылерыі праціўнік абстраляў шэсць населеных пунктаў, яшчэ па адным нанёс авіяўдар; на Запарожскім і Херсонскім напрамках пад агнявое ўздзеянне трапілі больш за 25 населеных пунктаў.
— Праціўнік спрабуе наступаць на Бахмуцкім і палепшыць тактычнае становішча на Ліманскім і Купянскім напрамках.
— За мінулыя суткі падраздзяленні Сіл абароны адбілі атакі расіян у раёнах населеных пунктаў Стальмахоўка і Белагораўка Луганскай вобласці і Салядар, Іванаўскае, Кляшчэеўка, Каменка, Аўдзееўка, Вясёлае, Вадзяное, Краснагораўка і Мар'інка ў Данецкай вобласці.
— Авіяцыя Сіл абароны за папярэднія суткі нанесла 12 удараў па раёнах канцэнтрацыі асабовага складу, узбраення, ваеннай тэхнікі і ўдар па пазіцыі зенітна-ракетнага комплексу праціўніка.
— Падраздзяленні ракетных войскаў і артылерыі УСУ пабілі пяць пунктаў кіравання, пяць раёнаў канцэнтрацыі жывой сілы і склад боепрыпасаў расійскіх сіл.
Мінабароны РФ: паспяхова наступаем на Данецкім напрамку
Расійскае ваеннае ведамства заявіла, што 29 снежня нанесла «масіраваны ўдар высокадакладнай зброяй» «па сістэме ваеннага кіравання і аб’ектах энергетыкі, якія забяспечвалі працу прадпрыемстваў абаронна-прамысловага комплексу Украіны», «усім прызначаным аб’ектам нанесенае паражэнне».
«У выніку ўдару спыненыя вытворчасць і рамонт ваеннай тэхнікі і боепрыпасаў, а таксама спыненае перакідванне рэзерваў УСУ з заходніх рэгіёнаў Украіны. У выніку парушэння чыгуначных перавозак пастаўленае для УСУ замежнае ўзбраенне заблакаванае ў тылавых раёнах», — зрабілі справаздачу ў МА РФ.
— На Купянскім напрамку нанеслі артылерыйскі ўдар па падраздзяленнях 14-й механізаванай брыгады УСУ ў раёне населенага пункта Петрапаўлаўка і 92-й механізаванай брыгады УСУ ў раёне населенага пункта Круглякоўка Харкаўскай вобласці. Знішчаны да 60 украінскіх вайскоўцаў, тры баявыя браніраваныя машыны і два пікапы.
— На Чырвона-Ліманскім напрамку ў раёне населенага пункта Ямполаўка Данецкай вобласці авіяцыя і артылерыя ўдарыла па канцэнтрацыі жывой сілы і тэхнікі 110-й брыгады тэрытарыяльнай абароны: знішчаныя больш за 40 украінскіх вайскоўцаў, чатыры баявыя браніраваныя машыны і пяць аўтамабіляў.
— На Данецкім напрамку падчас наступальных дзеянняў нанеслі паразу падраздзяленням 25-й паветрана-дэсантнай брыгады УСУ ў раёне населенага пункта Чырвоная Гара і 60-й механізаванай брыгады УСУ ў раёне населенага пункта Кляшчэеўка Данецкай вобласці. Страты УСУ за суткі на гэтым напрамку склалі да 50 украінскіх вайскоўцаў, тры бронетранспарцёры і чатыры пікапы.
— На Паўднёва-Данецкім напрамку ўдарамі авіяцыі і артылерыі па канцэнтрацыі падраздзяленняў 72-й механізаванай брыгады УСУ ў раёне населенага пункта Новаміхайлаўка, а таксама 108-й брыгады тэрытарыяльнай абароны ў раёне населенага пункта Прачыстаўка знішчаныя больш за 70 украінскіх вайскоўцаў, пяць баявых браніраваных машын і шэсць аўтамабіляў.
Усяго, паводле звестак МА РФ, за суткі нанесеныя ўдары па 73 артылерыйскіх падраздзяленнях, жывой сіле і ваенная тэхніцы УСУ ў 86 раёнах. Знішчаныя радыёлакацыйная станцыя ЗРК С-300, дзве радыёлакацыйныя станцыі контрбатарэйнай барацьбы AN/TPQ-50, дзве самаходныя артылерыйскія ўстаноўкі 2С1 «Гваздзік», баявая машына рэактыўнай сістэмы залпавага агню «Град», а таксама гаўбіцы Д-20 і Д-30. Збітыя самалёт МіГ-29 і два верталёты Мі-8 Паветраных сіл Украіны, шэсць ударных беспілотных лётных апаратаў, у тым ліку тры рэактыўныя беспілотныя лётныя апараты «Стрыж».
У Херсонскай і Луганскай абласцях знішчаныя восем украінскіх беспілотных лётных апаратаў, а таксама адзін БПЛА «Байрактар-ТБ2» (збіты ў раёне горада Ачакаў Мікалаеўскай вобласці).
Інстытут па вывучэнні вайны: расійская СПА неэфектыўная супраць беспілотнікаў
Свежая справаздача экспертаў ISW прысвечаная масіраванаму ракетнаму абстрэлу Украіны 29 снежня, а таксама аналізу заяваў найвышэйшых службовых асобаў Расіі і Украіны.
Расійскія сілы нанеслі яшчэ адну серыю масіраваных ракетных удараў па крытычна важнай інфраструктуры Украіны. Як адзначаюць у ISW, нягледзячы на тое, што расійскія сілы значна вычарпалі свой арсенал сістэм высокадакладнай зброі, яны імаверна, найбліжэйшым часам працягнуць маштабна пагражаць украінскай крытычна важнай інфраструктуры і прынясуць значныя пакуты ўкраінскаму цывільнаму насельніцтву.
Між тым неаднаразовыя ўкраінскія ўдары па ваенных аб’ектах у глыбокім расійскім тыле дэманструюць неэфектыўнасць расійскай СПА супраць беспілотнікаў, канстатуюць эксперты. Яны цытуюць заяву Мінабароны Брытаніі, якая адзначала, што Расія «змагаецца з процідзеяннем паветраным пагрозам у глыбіні [сваёй тэрыторыі]» і адначасова спрабуе задаволіць высокі попыт на СПА для палявых штабоў паблізу лініі фронту ва Украіне, што ў яе не вельмі атрымліваецца. У ISW таксама прадказваюць рост крытыкі ад расійскіх ваенных блогераў у адрас свайго ваеннага кіраўніцтва за няздольнасць абараніць тэрыторыю ад украінскіх удараў.
Заява кіраўніка расійскага МЗС пра тое, што Расія не прыме мірнага плана, прапанаванага Зяленскім, і што Крэмль не будзе размаўляць з украінскімі перамоўшчыкамі на ўмовах, якія ўключаюць вывад расійскіх войскаў з акупаванай Украіны, выплату Расіяй рэпарацый і ўдзел Расіі ў міжнародных трыбуналах, у Інстытуце расцэньваюць як нежаданне РФ ісці на сапраўдныя перамовы і прызнаваць Украіну.
Каментуюць аналітыкі і словы кіраўніка ГУР Кірыла Буданава пра тое, што баявыя дзеянні ва Украіне зайшлі ў тупік. Яны адзначаюць, што заява Буданава супадае з ацэнкамі ISW ад 28 снежня, згодна з якімі расійскі наступ вакол Бахмута блізкі да кульмінацыі і РФ у гэтым раёне, імаверна, не зможа дамагчыся значных поспехаў.
У ISW таксама адзначаюць, што Крэмль працягвае маніпуляваць расійскім заканадаўствам, каб ліквідаваць іншадумства і запалохаць прыхільнікаў Украіны. Так, 29 снежня Уладзімір Пуцін падпісаў дапаўненне да Крымінальнага кодэкса РФ, згодна з якім расіян будуць асуджаць на пажыццёвае зняволенне за «садзейнічанне дыверсійнай дзейнасці», за «праходжанне падрыхтоўкі з мэтай правядзення дыверсій» і за «арганізацыю дыверсійнай супольнасці», а таксама пазбаўляць волі на тэрмін ад 5 да 10 гадоў за «ўдзел у такой супольнасці». Эксперты канстатуюць, што пад выглядам перадухілення «дыскрэдытацыі» войска Крэмль яшчэ больш узмацняе кантроль над рэшткамі апазіцыі і над і без таго абмежаванай расійскай інфармацыйнай прасторай.
На што яшчэ звярнулі ўвагу эксперты:
- украінскія войскі працягвалі контрнаступальныя аперацыі ў раёне Крамянной, а расійскія войскі праводзілі абмежаваныя контратакі на лініі Сватава — Крамянная;
- расійскія войскі працягвалі наступальныя аперацыі ў раёне Аўдзееўкі, а таксама вакол Бахмута, дзе, імаверна, паскараецца патэнцыйная кульмінацыя расійскага наступлення;
- расійскія войскі працягвалі весці абарончыя дзеянні ў Херсонскай вобласці;
- расійскія акупацыйныя ўлады працягваюць узмацняць рэпрэсіі ў беспаспяховых спробах здушыць партызанскі рух на акупаваных тэрыторыях.
