Праблемы развязанай Расіяй вайны ва Украіне абмеркаваў 19 студзеня Аляксандр Лукашэнка з кіраўніком МЗС РФ Сяргеем Лаўровым.
— Праблемы, звязаныя з аперацыяй Расійскай Федэрацыі ва Украіне. Усё, што я абяцаў, усё, што трэба для Расіі ў гэты няпросты перыяд (што там для Расіі… Для нас — для Расіі і Беларусі), мы робім. Думаю, Сяргей Фёдаравіч (кіраўнік МЗС Беларусі Сяргей Алейнік. — Заўв. рэд.) вам найпадрабязнешым чынам пра гэта раскажа, — сказаў ён (цытата паводле БЕЛТА).
Ён таксама прызнаўся, што слухаў прэс-канферэнцыю Сяргея Лаўрова, якая прайшла 18 студзеня, і падтрымлівае абсалютна ўсе яго заявы.
— І пры любых кантактах, якія ў нас здараюцца з Захадам, іншымі, мы гаворым пра тое, што Расія ніколі не была супраць міру. Калі ласка, давайце будзем дамаўляцца. Мы гатовыя ў гэтым удзельнічаць. Вы ў гэтым не павінныя сумнявацца. Калі нешта трэба з нашага боку і мы можам зрабіць (вы добра ведаеце, што мы можам зрабіць), скажыце наўпрост, мы будзем працаваць разам, плячо да пляча, — запэўніў палітык.
Лукашэнка верыць у тое, што Захад «спрабуе выкарыстаць супраць Беларусі Украіну, але яна пакуль трымаецца».
— Сёння бяспека для нас, не толькі для Расіі, яшчэ важнейшая. Вы ведаеце задумы нашых заходніх суседзяў. Не толькі Украіны. Яны спрабуюць і Украіну выкарыстоўваць супраць Беларусі. Але што мяне дзівіць і ўражвае здзіўляе — Украіна пакуль трымаецца. Яна на правакацыі супраць Беларусі не ідзе. Хоць яе актыўна падштурхоўваюць нашыя заходнія суседзі. Таксама ведаеце хто, — заявіў Лукашэнка.
Сяргей Лаўроў падзякаваў Лукашэнку за сустрэчу і перадаў «прывітанне ад Уладзіміра Уладзіміравіча».
— Хоць вы з ім сустракаецеся… Мы палічылі — летась 10 разоў вы асабіста сустракаліся, акрамя тэлефонных кантактаў. Таму нам на ўзроўні кіраўнікоў знешнепалітычных ведамстваў не ўгнацца за вамі. Але так і мусіць быць, — падкрэсліў Сяргей Лаўроў.
Ён таксама адзначыў, што лічыць своечасовымі дамоўленасці з Беларуссю ў сферы абароны.
— Што да спецыяльнай ваеннай аперацыі — мы робім разам з нашымі беларускімі саюзнікамі, сябрамі ўсе неабходныя захады, каб засцерагчы сябе ад магчымых намераў, як вы сказалі, заходніх суседзяў. Мы бачым, як на поўначы Еўропы, якая была шмат у чым нейтральнай тэрыторыяй, цяпер асталёўваецца NATO… Фінляндыя, Швецыя — усё гэта вельмі блізка ад нашых межаў, — сказаў Лаўроў.
Пасля сустрэчы з Лукашэнкам, Сяргей Лаўроў правядзе перамовы міністраў замежных справаў дзвюх краін у фармаце «сам-насам».
