Раніцай 2 сакавіка з’явіліся паведамленні пра нейкую дыверсію ў Бранскай вобласці. Ва ўсім абвінавацілі ўкраінскіх дыверсантаў. Але адказнасць за атаку на сябе ўзялі рускія, што ваююць на баку Украіны. Увечары ФСБ заявіла, што дыверсантаў выціснулі на тэрыторыю Украіны і нанеслі па іх масіраваны артылерыйскі ўдар. Расказваем, што здарылася, хто ўзяў на сябе адказнасць і што з нагоды гэтага кажуць у Расіі і Украіне — каротка.
Што дакладна адбылося. Губернатар Бранскай вобласці Аляксандр Багамаз заявіў, што на тэрыторыю Клімаўскага раёна ў вёску Любячане 2 сакавіка з Украіны зайшла дыверсійна-разведвальная група. Вёску Сушаны атакаваў беспілотны лётны апарат. Акрамя таго, мінамётнаму абстрэлу падверглася вёска Ламакаўка.
Ахвяры. Паводле афіцыйных звестак, агучаных Багамазам, у вёсцы Любячане загінулі два чалавекі — кіроўца легкавога аўтамабіля і 56-гадовы мужчына. 10-гадовы хлопчык атрымаў раненні.
Хто ўзяў на сябе адказнасць. Адказнасць за атаку на сябе ўзялі прадстаўнікі Рускага добраахвотніцкага корпуса (падраздзяленне расійскіх добраахвотнікаў, якія ваююць за Украіну). Яны апублікавалі відэа побач з фельчарска-акушэрскім пунктам у Любячанах. Іх асобы верыфікавалі журналісты: людзі на відэа — насамрэч расіяне, якія ваююць на баку Украіны.
Што на гэта сказалі ў Расіі і Украіне. Прэзідэнт Расіі Уладзімір Пуцін назваў гэта тэрактам. Кіраўнік Чачні Рамзан Кадыраў заклікаў разабрацца не толькі з самімі дыверсантамі, але і з іх сем’ямі, якія жывуць на тэрыторыі РФ. Чалец камітэта Дзярждумы РФ па абароне Віктар Собалеў заявіў, што бяспека расійскіх грамадзян не будзе дасягнутая, пакуль з Украінай «будуць цырымоніцца», ён лічыць неабходным змяніць статус «спецыяльнай ваеннай аперацыі» і пачынаць вайну. Дарадца кіраўніка Офіса прэзідэнта Украіны Міхаіл Падаляк назваў тое, што адбылося, «класічнай правакацыяй» і заклікаў расійскія ўлады баяцца сваіх жа партызан.
Чым усё скончылася. ФСБ Расіі дала справаздачу пра спыненне «вылазкі» ўкраінскіх дыверсантаў у Клімаўскім раёне Бранскай вобласці. «Каб пазбегнуць ахвяр з боку мірнага насельніцтва і нанясення шкоды аб’ектам цывільнай інфраструктуры, праціўнік выціснуты на тэрыторыю Украіны, дзе па ім нанесены масіраваны артылерыйскі ўдар», — заявілі ў ведамстве. У Рускім добраахвотніцкім корпусе, чальцы якога заявілі пра пранікненне ў Бранскую вобласць, гэтае паведамленне пакуль не каментавалі.